Gutxik jarriko dute zalantzan autoa baliabide on bat izan daitekela. Noski, paretaren kontra jotzeko erabiltzen ez dugun neurrian.

Zientzia eta Teknologiak baliabide on eta garrantzitsu asko eskaini dizkigula zalantzan jartzea ere ez da lan makala. Baina baditugu hainbat adibide non emaitzei emandako erabileraren ondorioz emaitzen arduradunak inoiz jaioko ez balira hobeto izango litzatekela. Non dago, hala ere, gakoa? Agian ez horrenbeste ikertzaileetan, hainbestetan entzun izan dugun legez, baizik gugan, erabiltzaileongan.

Hau da hau! Beste behin ere toki berberera iritsi behar. Hezkuntza eta balioak. Badirudi oinarrizkoa landu gabe helburu mekanizistak jartzea ez dela irtenbide egokiena.

Agian, ikerlari izateko, ezagutza teknikoen ebaluazioa egin aurretik funtsezko balioen ebaluazioa egin beharko genuke... Baita argi izan, kasurik gehienetan, gakoa gurengan dagoela, hots, erabiltzaileongan.

Azkenaldian badirudi ikasketa teknikoek pisu gehiago hartzen ari direla, giza ikasketetan krisi bat eraginez. Hurrengo baten arituko gara zabalago gai hontaz, baina momentuz proposamen bat botatzera ausartuko gara. Sartu filosofa, soziologo eta psikologa bat ikerketa tekniko taldeetan. Ziur gaitzik behintzat ez dutela egingo eta etorkizunezko arazo dexente ekiditzen lagunduko digutela.

Zientzia eta Teknologia, zertarako askeago izaten laguntzen ez bagaituzte?

Askotan buruan darabilkidan pentsamendua da. Benetan merezi al du etengabe web orri hontan zer idatzi eta zein eduki sortu pentsatzen aritzea? Gaurkoan lagun batek zera komentatu dit "Joan zen astean zuen web gunean sartu nintzen eta oso interesgarriak iruditu zitzaizkidan edukiak". Jakin badakit inolako komentariorik ez duela idatzi blog honetan, baina nahiz eta irakurle bakarra izan, hemen idatzitako lerroak merezi dutelakoan nago.

Mila esker eta ea hurrengoan egur piskat ematera animatzen zaren. Badakit jakin horretan iaioa zarela eta ;-)